среда, 5 октября 2016 г.

Нимкодь лоны капитанӧн!

     Аннушлы талун тыри 9 арӧс. Ыджыд нин нылукным. Серавла, миян куим челядь, а быттьӧ ставӧн зонъяс. Ёртасьӧ Аннуш ёнджыкасӧ зонкаяскӧд, ывлаын радейтӧ котравны-гуляйтны, зэв асныра нывка. Но ми ог мырдысьӧн вежӧй сылысь русӧ, видам, дерт, эм кӧ мыйысь, но векджык ошкам мича серпасысь, "4" да "5"-ысь, сцена вылын петкӧдчӧмысь да с.в. Чужан лун кузя унатор козьналісны Аннушлы, а ме помышті нылук йылысь кывбур.
Нимкодь лоны капитанӧн!
Дозмук мыськыны мен дыш -
Мыдзӧ киӧй, мыдзӧ мыш.
Лоӧ тёлькӧдчыны дыр,
Сӧмын тасьті-пань оз быр!

Медводз ассьым чашка босьті,
Мыськи, пожъялі да косьті.
Тайӧ дозйыс медся мича,
Сійӧ синмӧс моз ме видза.

Ичӧт воклӧн кокньыд чашка,
Шыбитлӧ кор, оз и чашкав.
Татысь юлӧ медбур ёртӧй,
Ворсны волывлӧ кор гортӧ.

Сэсся черед паньӧдз воис,
Весиг гажаджык мен лоис.
Гиля-голь да тра-та-та,
Дарйӧн саридз кытшовта.

Дарыс бӧрся вилки вӧтчӧ,
Медводз лӧня, сэсся ӧддзӧ.
Найӧс суӧдӧны паньяс -
Шкапӧ водалӧны шаня.

Мыськан дозйӧ тасьті тюрис,
Сылы тшӧтш жӧ быгйыс сюрис.
Босьті мӧдӧс, витӧс, квайтӧс,
Бура нирта, ок и няйтӧсь!

Со нин караб гыяс вывті
Бӧрӧ-водзӧ чӧла кывтӧ.
Ыджыд ваыс улӧ пырӧ,
Сэсся бара качӧ нырыс.

Эг и тӧдлы, уджӧй эштіс,
Быгъя саридз ылӧдз вешті.
Дозмук шкапын, сӧстӧм бана.
Нимкодь лоны капитанӧн!

     Чужан лунӧн, муса нылук! Радейтам!

Комментариев нет:

Отправить комментарий