четверг, 24 декабря 2015 г.

Ичӧт кодзувъяс))

     Неважӧн миян йылысь, Нестеров ичӧт котыр йылысь, петкӧдлісны "Миян йӧз" петасын. Аттьӧ Люба Королёвалы, авъя, шань да мича нывлы! Аттьӧ Максимлы, Аннушлы да Мишуклы - ичӧт кодзувъяслы))

пятница, 18 декабря 2015 г.

8 тӧлысь

Талун меным кӧкъямыс тӧлысь. Сьӧктаӧй - 8300 грамм, тушаӧй - 69 см.
Шыблала джоджӧ ставсӧ, мый веськалӧ ки улӧ, верма дасысь шыбитны ӧтиторсӧ. Кужа кыскасьны, ачым воӧдча колана чача дорӧ.
Кыла кӧ шылад, заводита йӧйтыны да кекӧначасьны.

среда, 16 декабря 2015 г.

Ӧблезяна

     Люба коркӧ звӧнитӧ - мӧд во пӧ ӧблезяна во, верман пӧ вурны ӧблезянаӧс? Ыджыдӧс, кузь киа да кокаӧс? "Фотокухня КАДР" - налӧн верӧсыскӧд ӧтув проект, мыйсюрӧ вузалӧны, фотографируйтӧны салонас и. Коз дорас пӧ ӧблезянатӧ пуксьӧдам челядьӧс нимкодьмӧдны-кутлыны)). Но мый сэсся? Ме "ог"-тӧ шуны ог куж. Видла, мися, мый артмас...
     Юрлӧстӧ вура, а ыджыд чачатӧ некор на эг видлы вурнытӧ. Ӧтуввезйысь корсьышті. Ёна бурыс нинӧм эз сюр. Люба ассьыс мӧвпсӧ фотоӧн ыстіс. Заводитчис удж... Ӧблезянаыд ыджыд должӧн лоны да, выкройкасӧ важ обой вылӧ серпасалі. Дӧра ньӧби, но эз тырмы, костас мыйсюрӧ важ запасъясысь содталі - скодитӧді. Ничего тай видзӧдчӧ! Тӧдінныд кӧ, кымынысь ме юрсӧ резьӧдлі да бӧр вури!!! Аня шуӧ, квайтысь пӧ)) Верӧслы норася - нинӧм, мися, оз артмы, эновтчыны ковмас. Эн пӧ майшась, артмас бытьӧн!
     Бара босьтчи... Артмис тай сэсся кузьӧн-вӧляӧн. А юрыд кор лои, туша-ки-кок-бӧжыд ладӧн нин муніс. Люба шуӧ вӧлі ӧблезяна-зонкаӧс вурны, а менам вочасӧн вурсис нывка-ӧблезяна, гӧрд бантика)) Чайта, мусаник армис. Анякӧд снимайтчис бӧрын, мӧдлаӧ мунтӧдзыс, на память))
 
     А со "Фотокухня КАДР"-ын нин пукалӧ - тіянӧс виччысьӧ))

вторник, 15 декабря 2015 г.

Тувсов синва

     Со и петіс менам ичӧтик небӧг "Тувсов синва". Сэтчӧ пырисны уна воӧн чукӧрмӧм бурджык кывбуръясӧй: Коми му да коми кывлы сиӧм, дона йӧз да творчество йылысь. Мый йылысь сьӧлӧмӧй висьӧ, мыйлы лолӧй радлӧ. Ставыс тані...
     Со тай:
***
Муса ёртъяслы дойöс висьталi,
Кытшын пукалiг шогöс шоги.
Сэки вöлисти лолöй личалiс –
Горшöдз зэлалöм вöньöй потiс.
Кытшыс енэжкöд йитiс кывъясöс.
Дойöй разалiс, лолöй шедiс.
Енмыс кылiс да содтiс вынъясöс,
Помтöм радлунö эскöм сетiс.
     А со и ачыс небӧгыс:
      Ӧтувъя кышӧд улын петіс куим небӧг, менам (Алёна Старцевалӧн), Татьяна Шаховалӧн да Татьяна Кирпиченколӧн. Зэв аслыспӧлӧс небӧгъяс. Лыддьӧй. Чайта, кажитчас! Таня Шаховалӧн комилуныс уна, збыльвыйӧ классика гижӧдъяс, Таня Кирпиченколӧн сьӧлӧмыс уна, пыдіа мӧвпыштны корӧны. Менам эмоция вывтыралӧ.
     Аттьӧ Гижысь котрырӧн веськӧдлысь Е.В. Козловалы - небӧгъяссӧ лэдзны отсалӧмысь. Аттьӧ Е.Е. Афанасьева да Е.В. Козловлы - кывбуръяссӧ лӧсьӧдӧмысь. Аттьӧ П.И. Симпелевлы - гижӧд-серпасъяссӧ мичаа тэчӧмысь. Аттьӧ К. Крючковалы - сьӧлӧмӧ инмана серпасъясысь да веськӧдлысьыслы - А.В. Княжевалы, быд пӧрйӧ отсӧг сетӧмысь. Аттьӧ И.В. Калининалы - небӧг лист бокъясас фотографияясысь. Аттьӧ ёртъяслы-видзӧдысьяслы-кывзысьяслы - небӧгъяссӧ нимӧдӧм вылӧ локтӧмысь, бур кывъясысь. Зэв долыд вӧлі ставнытӧ аддзыны. Ставлы ыджыд копыр!
     Аттьӧ Максимлы-Аннушлы-Мишуклы кывбуръясӧс лыддьыны отсалӧмысь да гажсӧ мичмӧдӧмысь.
     Со тай фото гаж вылысь:
      Лыддьысьй комиӧн! Сёрнитӧй комиӧн! Гижӧй комиӧн! Быд бурсӧ тіянлы!

четверг, 3 декабря 2015 г.

Бӧръя аддзысьлӧм

     Сӧмын на неважӧн, октябр 14-ӧд лунӧ, аддзысьлім Владимир Тиминкӧд. Мишук и быдсӧн вӧлі, тӧдмасис нималана гижыськӧд.
 
 
     Сэк унаӧн чукӧртчим: Елена Козлова, Елена Габова, Елена Афанасьева, Диана Холопова, Пётр Столповский, Андрей Попов, Александр Суворов, том авторъяс. Ок и лӧсьыда пукалім! Сёрнитім литература йылысь, вуджӧдӧмъяс йылысь. Ставлы вӧлі, мый висьтавны, мыйӧн юксьыштны. Владимир Васильевич, кыдз и пыр, вӧлі зэв шмоньлив. Гора гӧлӧссьыс Мишук медводз повзис, а сэсся велаліс да, бура кывзіс, эз ыждав. Унмовсьліс на костас и. Ӧні мӧвпала да, мыйлакӧ ёна рад вӧлі аддзысьлыны Владимир Тиминкӧд. Рад, мый Мишук тӧдмасис мамыслы дона морткӧд. Гижысь омӧль нин вӧлі бӧръя воясӧ. Некод эз кӧсйы торйӧдчыны сыкӧд, но быдӧн нин тӧдіс, мый тайӧ луныс коркӧ воас...
     Талун видзӧда сы лунся фотояссӧ. Ставыс на син водзын. Шуда аддзысьлӧм. Бӧръя аддзысьлӧм...
Фотоыс

среда, 2 декабря 2015 г.

Видза корӧм

    Дона ёрт, декабр 9 лунӧ корам волыны том авторъяслысь выль небӧгъяс нимӧдӧм вылӧ. "Муслун" - тадз шусьӧ ӧти кыш улӧ ӧтувтӧм куим асшӧр кывбура небӧг.
     Сборникъясын петкӧдчысь радейтӧмыс быд авторлӧн аслыспӧлӧс, но век жӧ, зэв матыс... Татьяна Шахова юксьӧ Коми му дінӧ муслунӧн "Пелыся му" небӧгын. Татьяна Кирпиченколӧн "И воас лун..." сборникын воссьӧ кык морт костын радейтчӧм. "Тувсов синва" небӧгын Алёна Старцева гижӧ коми кыв дінӧ муслун йылысь. Чайтам, кывбуръясыс вӧрзьӧдасны тэнсьыд сьӧлӧмтӧ, лыддьысьысь! Волы, кывзы да юксьы аслад муслунӧн.
Фотоыс Евгений Козловлӧн.

пятница, 27 ноября 2015 г.

Том гижысьяслӧн бать

     Ӧнӧдз оз эскыссьы, мый кувсьӧма Владимир Васильевич Тимин, коми войтырӧн пыдди пуктана морт.
     Владимир Васильевич бласлӧвитіс гижан удж вылӧ сы мында том гижысьӧс! Гожся университетӧ ветлысьясӧс, бать моз, велӧдіс петны лыддьысьысь водзӧ восьса сьӧлӧмӧн, корис радейтны чужан му, чужан кыв, "зарни бордъяса, медся мыласӧ", тшӧктіс уджавны быд лун, некор не эновтчыны гижӧмысь. Бур кывбуръясысь век ошкис, а мыйкӧ кӧ эз артмы, некор эз шу, мый гижӧдъясыд лёкӧсь, век сетіс надея, мый мӧдысь ставыс артмас, мый бур кывбурыдлы колӧ кад, век эскис миянӧ. Век эскис!
     Бӧрас нин, быд паныдасьлігӧн, юасис олӧм йылысь, сьӧлӧмсянь радліс миян публикацияяслы, небӧгъяслы, и век шмонитіс. Владимир Васильевич моз шмонитнысӧ, чайта, некод эз куж! Ас йывсьыс сы мында висьталас: медводдза кывбуръяссӧ киритӧм да вӧв вылын литератураӧ пырӧм йылысь, батьыслӧн "нормальнӧйӧн тай водзті вӧлі-а" шуӧмсӧ, казьтыштлас и мунӧмаяссӧ, и гижысь ёртъяссӧ... Пызан сайын век вӧлі гажа, пукаліс кӧ орччӧн Владимир Васильевич.
     Кута киын Владимир Тиминлысь сборниксӧ, лыддя ас кежысь кывбуръяяссӧ, и тайӧ жӧ здукӧ сувтӧ син водзам ачыс гижысьыс, мича костюма, еджыд юрсиа, статя... И гӧлӧсыс, сэтшӧм тӧдса, сэтшӧм ас, кӧнкӧ гора, кӧнкӧ ньӧжмыд, но век лыддьысьысьлы мӧрччана, ясыд!
     Ті век лоанныд миян сьӧлӧмъясын, Владимир Васильевич! Некор помӧдз ог эскӧй, мый гижысьяслӧн рыт вылӧ, ӧдзӧс паськыда воссяс да, оз пыр Владимир Тимин, мича, ён, статя...
 
     Таво Аня да Максим тӧдмасисны В.В.Тиминкӧд, а неважӧн и Миша тшӧтш.

среда, 18 ноября 2015 г.

7 тӧлысь

Меным сизим тӧлысь. Сьӧктаӧй - 8100 грамм, тушаӧй - 69 см.
Ачым нин пукавла, усьла сӧмын корсюрӧ. Петкӧдла мунысьлы данньӧ да нюжӧда "а-а-а". Артмылӧ и аттьӧ шуны. Кор петіс медводдза пинь, ыждалышті.

Юбилей

     Но мый? 30 ар тай тырис. Гижысь ёртъяскӧд пукыштім, тшай юыштім. Сы мында шань кыв шуисны ставӧн - лов вылын шоныд-шоныд, югыд-югыд лои. Во кежлӧ позитив)) Небӧг, юмовтор да сувениръяс козьналісны и. Лыддьысьны-чӧсмасьны во чӧж позяс. А медводзӧн кампеттӧ пиӧй козьналіс)) Молодеч тай! Аннуш сёйысь чача асывнас мыччис, а Максим чӧскыд шоколад вылӧ сьӧмсӧ, вӧлӧм, чӧжӧма. Шудааааааааа...
 

воскресенье, 15 ноября 2015 г.

Ме эска тэд...

     Талун пасйӧ чужан лун авъя, мелi, мича, шань, зiль, югыд нюма да ыджыд вежӧра ань, миян дона ёрт Елена Афанасьева! Елена сӧвмӧдӧ коми кыв. Дыр кад чӧж нин уджалӧ "Арт" журнал редакцияын, ӧнi нӧшта зiльӧ Гижысьяслӧн союзын литературнӧй консультантӧн. Та кындзи, уна во уджалӧ гижысь челядькӧд став республика пасьта, нуӧдӧ мастер-классъяс да семинаръяс. Еленаӧс тӧдӧны, радейтӧны. Миянлы, "Ычукӧрлы", ёртным отсасьӧ вит воысь дырджык нин. Сiйӧ пуктiс ыджыд пай асшӧра небӧгъясным петӧмӧ, лыддьысьысьясӧд аддзысьлӧмъяс вылӧ ветлӧмӧ, выль мӧвпъяс-проектъяс вынсьӧдӧмӧ. Ог тӧд, артмис-ӧ мыйкӧ Ленатӧг... А медшӧрыс, Елена Афанасьева мыччӧдӧ чужан му да коми кыв дiнӧ радейтӧмсӧ кывбур-висьтъясас, локтӧ муслуннас быд лыддьысьысь дорӧ. Ме радейта Леналысь творчествосӧ, торъя здукӧ муса торъя кывбур. Талун меным матыс тайӧ:
     Ме эска тэд, эска -
     Тэ радлунӧн тыр.
     Тэ олӧм.
     Тэ тувсовъя долыд:
     Кор восьтала ӧшиньяс,
     Тӧвруӧн пыр,
     Мед керкатi ветлӧдлас лолыд.

     И мед танi ставыс дзик
     Здук кежлӧ,
     Мед:
     Лӧз дзоридза видзьяс
     И енэжын ытва.
     И ставсӧ,
     Мый босьтлi ме,
     Бӧр вая тэд.
     И нӧшта на радейтӧм
     Лов тырӧн пырта.
     Кутшӧм джуджыд мӧвп, кутшӧм ыджыд радейтӧм тыдалӧ кывбурас!
     Аттьӧ, Лена, ставсьыс! Чужан лунӧн!!!

среда, 11 ноября 2015 г.

80!

     С.Я. Маршак нима челядьлӧн лыддьысянінлы, кӧн ме уджала)), таво тырӧ 80 во! Вежон чӧж сэні-тані мунӧны кыпыд гажъяс. Талун лыддьысянінӧс нимӧдана рыт лоас В.А. Савин нима драмтеатрын. Корам ставнытӧ! А неважӧн Маршаковкалы вӧлі сиӧма дзонь передача. Видзӧдам!))

вторник, 10 ноября 2015 г.

Гӧгрӧс во))

     Таво ичӧт котырным тыр гӧгрӧс пасӧн. Сентябрын верӧскӧд пасйим 10 вося кӧлысь. Томӧн петі верӧс саяд да, синмӧн лапнитны эг удит, гозйӧн нин олам, челядь воисны, ӧти, сэсся мӧд... Верӧслы водзвыв висьталі, мися, дас вонад выльысь платтьӧасьла, сэкся кӧрсӧ мед кывны. Шуӧма - вӧчӧма. Гажӧдчим - йӧктім - чӧсмасим. Дерт, гӧсьтыс эз вӧв сэкся мында, дзонь Ыджыдвидз да Луздорса воысьяснад бура унаӧн чукӧрмылім, но век жӧ, ӧні и асьным ми витӧнӧсь лоим, рӧдвуж да ёртъяс чолӧмалісны и!
10 во сайын.
Ӧні.
     Ноябрын сэсся ме юбилеяся - 30 ар тырӧ, а декабрын Максимушлы 10 арӧс лоӧ! Видза корам, кыдз шуласны!))

понедельник, 9 ноября 2015 г.

Ё

     Ё-маё, юрӧс дзикӧдз куштіс Ё.
     ))
     Чужи Алёнаӧн, а кор 10 во сайын петі верӧс сайӧ, овӧс вежигӧн паспортам Аленаӧн индісны.
     Алена кӧ и Алена, ё-тӧ тшӧкыда е-над гижӧны да, некод некор эз шулы, мый тадз оз позь.
     Но абу ставлы паспортисткаяс ног вӧлӧма. 10 во мысти е-ад крукасисны кага документ вӧчигӧн - тэ пӧ вымышленнӧй морт, верӧсыд пӧ мӧд ань вылӧ гӧтрасьӧма, Алёна вылӧ...
     Ковмис паспортӧс вежны.
     Йирым 7-ӧд лунӧ бӧр нимаси, кӧть эськӧ 10 во мӧд мортлысь нимсӧ новлӧдлі.))
     Ӧні сэсся лоӧ котравны, мед мукӧд документ вежлавны - 3-нан кага чужӧм йылысь гижӧдъяссянь СНИЛС-ӧдз.
     А паспорттӧ вежигад шуисны, ми пӧ абу мыжаӧсь, техника пӧ мыжа.)) Сьӧмтӧ босьтісны и...
     Сідзкӧ, чолӧм, Алёна!!!
 

воскресенье, 1 ноября 2015 г.

31.10

Налы, коді кольччис енэжас...



суббота, 31 октября 2015 г.

Быдтам вай коми ныв-пиянӧс!

     Ме, коми сиктысь петӧм ныв, векджык сёрнита комиӧн: сиктсаяскӧд, гортсаяскӧд, уджвывсаяскӧд. Казьтывсьӧ, бать-мамкӧд весиг рочӧн сёрнитан лунъяс котыртлім, мед карын, рочьяс пиын, эгӧ шӧйӧвошӧй. Чужан кывйӧс помтӧг радейта. Студенталігӧн эг ӧтдортчы сыысь – быдлаын, лавкаын ли улич вылын, сёрниті комиӧн. Та вӧсна, некор эг вермы мӧвпыштны, мый аслам челядьӧй рочмасны!
     Дас во сайын чужис пи, сэсся ныв. Рузума кадсянь сёрниті накӧд дзик комиӧн. Тӧдсаяс повзьӧдлӧны вӧлі – садикас пӧ оз кутны гӧгӧрвоны кагульничаясӧс да челядьӧс. Ме сӧмын сералі на вылын, кӧть и повзьылікодь, друг, збыльтор висьталӧны. Вочасӧн воис детсадйӧ мунан кад. Ӧдйӧ тай и велалісны роч кывъяд. Садикад сідз сӧмын швачкӧны рочӧн, гортӧ локтӧны – рочасьӧны жӧ. Ме, йӧй юрӧн, налы рочӧн жӧ вочавидзи. Кытчӧ воштылі садьӧс? Ог тӧд! Эг и казявлы, кыдз челядьыд менам дзикӧдз рочмисны. Коми кывтӧ гежӧда шулісны, а во-мӧд мысти и ньӧти эг кут кывны. Роч кывйыд тай ӧдйӧ пысасьӧ вежӧрад – он мын сэсся сыысь.
     Аттьӧ, ӧти лунӧ кодкӧ быттьӧ юрӧ кучкис – ӧвсьы, Микулай Ӧльӧн, мый нӧ тэ керан? Став бать-мамыс кӧ кутасны ныв-пияныскӧд рочасьны, вояс мысти комиӧн сёрнитысьыс бырас! Тайӧ дзик гӧгӧрвоанатор. Шуам, гӧтрасис коми ныв ли коми зон, чужтіс кагукӧс да кутіс сыкӧд рочасьны, сідзкӧ, тайӧ котырас коми кывлы воис пом! Мӧд котырын тадз, дай коймӧдын… Видзӧдлыны кӧ менам тӧдсаяс пиысь, дас том гозъяысь витыс челядьныскӧд рочасьӧны. Кытысь та бӧрын сё во мысти босьтчас комиыс?! Некысь оз! Школаясын да асшӧра кыв велӧдӧм оз сет тырвыйӧ коми мортсӧ. Оз позь, мед пӧль-пӧчьяссянь кыссьыс комилуныс кытікӧ орис. Оз позь! И ставыс миян, том йӧз, сайын!
     И кор ме тайӧ гӧгӧрвои, шӧйӧвоши, повзи. Босьтчи ас котырӧ, но сёр нин. Челядь кӧть и тӧдісны коми кывсӧ, эз сёрнитны. Тэ налы комиӧн шуан – найӧ рочӧн. Во-мӧд колис да, аттьӧ, кыкысьсӧ дас пиысь вочавидзасны жӧ комиӧн. Но акцентныс! Юръяндзим. Дерт, водзӧ и водзӧ кута накӧд уджавны. Коми гимназияӧ кыкнансӧ сеті. Но тайӧ нокыс эз эськӧ ковзьы, ме кӧ водзті эг лэдз вӧжжисӧ, да эг сет позянлун, медводз аслым, рочасьны челядькӧд.
     Ӧні менам чужис коймӧд кагук. Дерт, ме сыкӧд ог рочась. Олӧмыс велӧдіс. Чайта, Ӧньӧ Миш быдмас чужан му да чужан кыв радейтысь мортӧн. Ме кӧсйыси та йылысь аслым. Но мый вӧчны Максимкӧд да Аннушкӧд? Уджавны, а сідзкӧ, лыддьысьны комиӧн, сёрнитны комиӧн… Мӧдарни оз позь!
     Мыйла ме тайӧ ставсӧ гижа ас йылысь? Ме кӧсъя, мед тэ, том морт, эн сконъясь ме моз, эн кеж коми кывсӧ пыдди пуктӧмысь. Ме тӧда, мый тэнад вояс мысти чужас кагук, да тэ, дерт жӧ, пуктан став вынтӧ, мед сійӧ быдмис сюсь, шань, вежӧра мортӧн. А медшӧрыс, козьналан сылы меддонаторсӧ – чужан кыв.

Том йӧзлы

***
Коми йӧз, мый нӧ ті керанныд?
Пӧльяслысь оласног неранныд!
Юр вывсянь кок улӧдз рочманныд,
Лунысь-лун быранныд-шочманныд.

Мыйла нӧ асланыд пиянад
Кыв дінӧ муслунсӧ вианныд?
Он накӧд сёрнитӧй комиӧн,
Кытчӧдз ми тадзитӧ воамӧй?

Збыль ӧмӧй, Коми му выланым
Рочьясӧн асьнытӧ кыланныд?
Абу нин кольӧма яндзимныд.
Кокньыд тай петан туй аддзӧмныд!

Воӧй бӧр ас садяд, донаяс.
Ставӧн ми Парма йӧз, комияс.
Ачымӧс кора и тіянӧс –
Быдтам вай коми ныв-пиянӧс!
                               Алёна Старцева

пятница, 30 октября 2015 г.

Мишук

     Мыйла Мишук?
     Кор тӧдмалім, мый пи чужас (ме мыйлакӧ чайті, мый ныв лоӧ, а кор шуисны, пи пӧ, вомӧй минут вит эз тупкысь))), кутім мӧвпавны ним серти.
     Менам ичӧтик "бзик" вӧлі бытьӧн шуны М вылӧ. А мый? Анна, Андрей да Алёна эм нин, куим А, а Максим сэсся ӧтнас М вылӧ да)) Сідзкӧ и мӧд М мед лоас!
     Челядькӧд мӧвпалам, мый эськӧ мичаджык да меліджык, Матвей ли, Марк ли)) Батьыс дінам сулаліс, кывзіс сёрнинымӧс сэсся и шуӧ, гашкӧ, Михаил...
     Сэсянь сэсся Мишук нимасис)) Ставнымлы сьӧлӧм вылӧ воис Михаил Андреевичыд...
     Нина Куратовалысь "Мишук быдмӧ лунысь лунӧ"-тӧ ичӧтдырйи 100-ысь, гашкӧ лыддьылі - сэтшӧма кажитчыліс.
     А со и аслам Мишук быдмӧ лунысь лунӧ.... 6 тӧлысся пӧрнӧй зон нин! Ло, пиукӧй, дзоньвидзаӧн. Ми тэтӧг ӧні ог нин вермӧй овны.

четверг, 29 октября 2015 г.

Юрлӧс вурӧм

     Ӧтуввезйысь аддзи челядь нимъяса зэв мусаник юрлӧсъяс. Медводз кӧсйи судзӧдны кагукъяслы. Но донсӧ тӧдмалі да, пласьт уси! Час, мися, ачым видла вурны. Артмас ли оз ли, но лоӧ видлӧма!
     Ньӧби кык сикас дӧра да синтепон. Корси ӧтуввезйысь юӧр, кыдз вурсьӧны юрлӧсъяс. Веськыда шуа, материалыс абу ёна уна. Аслым ковмис мыйсюрӧясӧ воӧдчыны. Та вӧсна, гижышта, кыдз-мый уджыс муніс. Мастер-класс сяма)) Гашкӧ, кодлыкӧ окота лоӧ вӧчны тшӧтш.
     1. Заводитам шыпас мыгӧрсянь. Менам видлӧгын - Ш шыпас. Гижӧны, мый позьӧ шыпассӧ ыдждӧдны да лэдзны компьютерысь. Гашкӧ, и тадз бур лоӧ, этшаджык нокыс. Ме серпасалі шыпасъяссӧ чорыд кабала вылӧ линейка-карандаш отсӧгӧн. Шыпас судта-кузьтасӧ босьті 21 см, 1 см-ыс мунас вурӧм вылас. Талунъя лун кежлӧ верма нин шуны, мый мукӧд шыпасъясыс, видлӧг вылӧ, Н, С, Я, бурджыка видзӧдчӧны векньыдджык кузьтаӧн (21x18 см.), сэк шыпасыс лоас 20 см судта, 17 см кузьта. Ш-лы бура лӧсялӧ 20x20. Позьӧ, дерт, ёна ыджыд юрлӧсъяс вурны, чоюкъяслы вури ыджыдджык шыпасъяс да бокас инді фетрысь нимнысӧ. Найӧ ӧд ыджыдӧсь нин да, мыйла дурны дзоньнас нимнас)). Со кыдз снимок вылын.

     2. Дась выкройкасӧ вуджӧдам дӧра вылӧ да вундам, позяс босьтны ӧтар-мӧдарсяньыс шыпасыслы разнӧй дӧра, мед, шуам, кор бергӧдам шыпассӧ мышнас, мӧд сер мыччысяс. Дерт, водзвыв дӧрасӧ колӧ гладитны. Ме босьті сер, кӧн гӧрд да лӧз ошкильяс бергӧдігас видзӧдӧны улӧ-вылӧ. Оз позь вунӧдны, мый Я, И, У да мукӧд шыпасъяслы колӧ выкройкасӧ вӧчны "зэркальнӧя", мед лӧсяласны бан да мышкыс вуригас. Со тадз снимок вылын.
     3. Шыпас пасьтасӧ ме босьті 6 см, сэн тшӧтш 1 см мунас вурӧм вылас, коляс 5 см пасьтанас. Кодкӧ 4 см пасьтасӧ босьтӧ, кыдз сэсся аслыныд кажитчас, кызджык шыпас ли вӧсниджык. Позьӧ вундыны тайӧ жӧ дӧраысь, позьӧ мӧд рӧм. Медшӧрыс, мед дӧраыс кузь вӧлі, мед тырмис шыпасыслы вуригас. Со тадз.
     4. Ӧні колӧ киӧн босьтавны шыпаслысь бансӧ да "боковинкасӧ", вурны. Вуригад пельӧсъяссӧ колӧ вундыштавны, мед оз кӧрсьы дӧраыс. А вурны киӧн колӧ медводз сы вӧсна, мый юрлӧсыс вежыньтчӧ, он кӧ веськав шыпас мышсӧ вуригас пельӧсъяснас симметричнӧя шыпас баныслы. Кодкӧ емӧн босьталӧ, а оз киӧн вур. Позьӧ и сідз. Кодлы кыдз кивывджык. Вурны заводитны колӧ сэтшӧм инсянь, кӧн озджык кут тыдавны дӧра ӧтлӧдӧмыс. Позьӧ увсяньыс, позьӧ кутшӧмкӧ пельӧссянь. Со тадз снимок вылын.
     5. Кор баныс шыпаслӧн вурсис, вурам мышсӧ, но вундыштӧмӧн ли карандашӧн ли дӧра вылас индам пельӧсъяссӧ, мед не сорасьны, мед шыпасыс бӧрас мича видзӧдчас, а оз вежынясь-кӧрсьы кытсюрӧясті. Кор вурсис кинад, позьӧ вурны нин машинкаӧн. Сэк сӧмын тюр да тюр дӧраӧд)) Мен верӧс козьналіс вурсян добрасӧ чужан лунӧ да, зэв рад)) Со тадз вурся.
     6. Шыпас вурсис, сунис помъяссӧ кӧрталім-вундалім, позьӧ бергӧдны нин сійӧ розьӧдыс, коді коли вуртӧм. Гӧгыля Я, Ю, О вуригӧн медводз колӧ вурны шыпас бансӧ да гӧгыль бансӧ "боковинканас", сэсся мышсӧ шыпаслысь, сэсся бергӧдны да, мышсӧ гӧгыльыслысь киӧн нин босьтавны. Мӧд ногасӧ оз артмы. Гашкӧ, тіян артмас)) Шыпас бергӧдӧма, синтепон-синтепух (мыйӧн кутанныд сюявны шыпассӧ) дасьтӧма. Позяс и "вердны" юрлӧстӧ)). Со тадз.
     7. Ӧні нин юрлӧс, позьӧ шуны, дась. Коли вурыштны киӧн розьсӧ, кыт бергӧдінныд шыпассӧ да сюялінныд синтепонсӧ, мичмӧдны мыйӧнкӧ асьсӧ, окота кӧ. Ме мичмӧді тадз.
      МИШУК вурсис, мен лои нимкодь, мый ставыс артмис)) Збыль вылас кӧ, медводдза шыпассӧ вуригас кӧсйи ӧвтчыны ставсьыс, некыдз уджыс эз мун, судзӧда, мися, всё-таки)) Но эг шыбит уджӧс, 1 шыпассӧ вайӧді помӧдз, и УРА - артмис!
     Сиа, мед и тіян уджыд век артмас, мед кӧть и оз сразу, эн повзьӧй, водзӧ мунӧй - ставыс лоас бур!!!
 

среда, 28 октября 2015 г.

Тырмас!

Но мый? Тырмас нин тутвидзны))) Колӧ блогйысьны!

Д о н а ё р т ъ я с ӧ й ! ! ! Вайӧ водзӧ сӧвмӧдам блогъяснымӧс!

воскресенье, 18 октября 2015 г.

6 тӧлысь

Меным ар джын нин. Ыджыд зон нин. Сьӧктаӧй - 7800 грамм, тушаӧй - 67 см.
Пукавла юрлӧсъяс костын, кыска ставсӧ аслым, орӧді весиг мамӧлысь сикӧтшсӧ.
Сёянтӧ меысь он нин дзеб, горза, оз кӧ сетны мыйкӧ. Кристина тьӧт эськӧ видлӧ мамӧс, юмов-сола-пражитӧмӧн кӧ вердӧ. А мам сӧмын нюмъялӧ. Ме дубтӧ ог сёй. Асьныд сёйӧй!

пятница, 18 сентября 2015 г.

5 тӧлысь

Вит тӧлысся зон нин. Сьӧктаӧй - 7500 грамм, тушаӧй - 66 см.
Кужа бергавны сэтчӧ-татчӧ, кыскасьны бӧрӧ. Радейта чужъясьны, косявлыны газет-бумага, ворсны чачаӧн, медводз, дерт, ставсӧ кыска вомӧ.
Кодкӧ кӧ менӧ корӧ, корся синмӧн мортсӧ.

вторник, 18 августа 2015 г.

4 тӧлысь

Талун меным нёль тӧлысь. Сьӧктаӧй - 7100 грамм, тушаӧй - 64 см.
Сӧмын велалі мыссьыны ваннаын да пывсянын, водзті ёна бӧрді. Ӧні весиг долыд ванад дурнытӧ.
Уличаад гуляйтнытӧ тшӧтш кутіс кажитчыны, узьлывла коляскаын корсюрӧ, ог дӧзмӧдчы мамӧлы бӧрдӧмӧн.

суббота, 18 июля 2015 г.

3 тӧлысь

Меным куим тӧлысь. Сьӧктаӧй - 6700 грамм, тушаӧй - 63 см.
Кужа бергӧдчыны кынӧм вывсянь мыш вылӧ, гораа серавны, ворсны погремушкаясӧн.
Корсюрӧ кора мамлысь арбуз тор либӧ шыд ва.

четверг, 18 июня 2015 г.

2 тӧлысь

Меным 2 тӧлысь. Сьӧктаӧй - 6100 грамм, тушаӧй - 60 см.
Радейта нёнявны чуньӧс, видзӧдавны гӧгӧрбок мичаторъяссӧ, овны ки вылын.
Новла гачьяс, кута юрӧс, юа паньысь сӧстӧм ва.

понедельник, 18 мая 2015 г.

1 тӧлысь

Талун меным тӧлысь. Сьӧктаӧй - 4900 грамм, тушаӧй - 56 см.
Радейта нёньгыны, бӧрдны, нюмъявны анделъяслы. Ыджыд уджӧ нин велалі - исяся кок костын.

суббота, 18 апреля 2015 г.

Ме чужи!

Чолӧм!
Ме Мишук!
Чужи апрель 18-ӧд лунӧ 13 час 5 минутын.
Сьӧктаӧй - 3660 грамм, тушаӧй - 52 см.
Батьӧй да чой-вокӧй нимкодьпырысь вочаалісны менӧ.
Заводитчӧ менам кузь да шуда олӧм.
Вочаалӧй!

пятница, 17 апреля 2015 г.

Пиуклы

Муса пиӧй, лок вай, лок.
Батьыд-мамыд виччысьӧны,
Чоя-вока виччысьӧны.
Окаласны ки да кок.

Батьыд удал чери кыйны,
Коз пу йылысь пӧтка лыйны.
Пыжнас катас шлыв да шлыв.

Мамыд сера дӧрӧм вурас,
Дінас гач да кӧті сюрас.
Кӧсъян - йӧкты, кӧсъян - сьыв.

Чоя-вока гажӧдасны,
Чибӧ-вӧлӧн ворсӧдасны.
Лоан дзуми-люки-дзум.

Ыджыд батьыд черсӧ сетлас,
Ыджыд мамыд ягӧ ветлас.
Няман пувсӧ шлум да шлум.

Вӧрыс-ваыс быдсӧн виччӧ,
Шоныдсӧ да бурсӧ видзӧ.
Муса пиӧй, лок вай, лок.

Батьлӧн-мамлӧн гажыс быри,
Чоя-воклӧн гажыс быри.
Окаласны ки да кок.

среда, 15 апреля 2015 г.

С. Поповлӧн кывбур

     Полина Старцева пырӧдчис Кӧрткерӧс районса шӧр лыддьысянінӧн дасьтӧм конкурсӧ да лыддьӧ Серафим Поповлысь Ыджыд тышлы сиӧм кывбур.

вторник, 14 апреля 2015 г.

Максим йӧктӧ

     Максим пиукӧй медводдзаысь петкӧдчис бальнӧй йӧктӧмъясӧн карса вермасьӧмын. И бураа йӧктіс - медводдза да мӧд места вичмис сылы да Марина ёртыслы. Аслас вомыс пельӧдз - гортӧ локтіс да. Шуасьӧ нин вӧлі, гашкӧ пӧ, сэсся ог кут йӧктыны, а карате ли футбол вылӧ ветлӧдлыны кута. Но, мися, кыдз ачыд кӧсъян... Ӧні сэсся мӧвпалӧ, кыдз да мый водзӧ овны)). Гожӧмӧдзыс тай оз на кӧсйы дугӧдчыны йӧктӧмсьыс а)).

воскресенье, 12 апреля 2015 г.

суббота, 11 апреля 2015 г.

Ыджыд лунӧн!

Зэрӧ. Аски - Ыджыд лун.
Ва гуранӧ видзӧдча.
Пемыд паськӧм мем оз мун.
Нюмъялӧмӧн мичӧдча.

Олӧм гыясын эг пӧд.
Радла пулы, пемӧслы.
Эска, кӧть и ог на тӧд
ачым, кутшӧм Енъяслы.

Нинӧм вылӧ лӧг ог кут.
Лёксӧ вежӧ волысьӧм.
Меным усис помтӧм шуд -
лоны татчӧс олысьӧн.

Зэрӧ. Аски - Ыджыд лун.
Ва гуранӧ видзӧдча.
Пемыд паськӧм мем оз мун.
Нюмъялӧмӧн мичӧдча.
                         Зарни Люся


воскресенье, 5 апреля 2015 г.

Берба-баля

Ог ме лачкы, берба лачкӧ! Ог ме лачкы, берба лачкӧ! Дзоньвидзалун ставлы. Берба лунӧн!
Фотоыс Станислав Новиковлӧн

суббота, 28 марта 2015 г.

Лов шы видзысь

     С.Я. Маршак нима лыддьысянінын пекничаӧ гажаа пасйим Коми небӧг лун! Воліс уна гӧсьт, тшӧтш и Сосногорск карысь "Лов шы видзысь" сьылан-йӧктан-ворсан котыр. Веськӧдлысьыс - Евдокия Рочева. Челядь гажӧдісны видзӧдысьясӧс, ворсӧдісны сцена вылын, сьылісны-йӧктісны. Тӧдчӧ, мый Евдокия Рочева ёна радейтӧ коми кыв - ворсӧмъясыс лӧсьӧдӧма буретш коми кыв карса челядьлы велӧдӧм вылӧ.
     Максим да Аннуш тшӧтш артисталісны - Кыйсьысь да Ошкильӧ пасьтасьлісны. А медъёна нимкодьмӧдіс сійӧ, кор ань сцена вывсянь юаліс видзӧдысьяслысь: "Коми кывсӧ нӧ кодкӧ гӧгӧрвоӧ-оз?", да Аннуш зэв азыма лэптіс кисӧ, ӧти мортӧн, буди, и вӧлі да))).

пятница, 27 марта 2015 г.

Мамук

     Мамук, Старцева Эльвира Александровна, ыджыдвидзса тэрыб ань. Эльвира Александровна верӧсыскӧд быдтісны 4 ныв-пиӧс, ӧні гӧгапиян нин Ыджыдвиддзӧ гӧсти волӧны.
     Эльвира Александровна бура уна во уджалӧ школаын, ышӧдӧ ныв-зонмӧс радейтны коми кыв, чужан му да орччӧн олысьясӧс.
10 воысь унджык сиктса челядьлы нуӧдӧ «Шондібан» этноклуб, кӧні ныв-зон оз сӧмын петкӧдчыны сцена вылын, гижны кывбур-выисьт, пырӧдчыны туялан уджӧ, ки помысь вӧчасьны, но и пелькӧдӧны чужан сиктнысӧ лӧп-ёгысь, отсасьӧны пӧрысьяслы пес поткӧдлыны-тэчны, нимкодьмӧдӧны висьысь челядьӧс козинъясӧн.
     Та кындзи, мамук сьылӧ да йӧктӧ, мичаа серпасасьӧ да ас киӧн быдсямасӧ вӧчӧ, пырӧдчӧ челядькӧд быд сикас конкурсӧ. Ми, чоя-вока, унаысь кевмам: «Мамук, шойччышт, лолышт, дзоньвидзалун йывсьыд мӧвпышт…» Кӧн нин?! Овлӧ, 8 часын школаысь воӧ, ныр вылас усьтӧдз бара уджалӧма. Та понда тшӧкыда юрыс да сьӧлӧмыс висьӧ… А век на ставсӧ котӧрӧн-котӧрӧн вӧчӧ. Дзик Густя мамыс да Рая чойыс кодь жӧ…
     Збыль вылас кӧ, быд мортлы аслас мамыс – медбур, медмича, медшань. Бать-мамыд ӧд сетісны тэныд меддонаторсӧ – олӧм! А сэсся и пуктісны став выннысӧ тэнад быдтӧмӧ. Мукӧдысь кывлан шог юӧр – «мамыс» ичӧт кагуксӧ шыбитӧма-кольӧма кытчӧкӧ… Но сьӧлӧмтӧм нывбабаыс ӧд, эскам, этша, а радейтысьыс, меліыс, узьтӧм войяссӧ коллялысьыс – ёна унджык.
     И миян, челядь сайын, вӧчны сідз, мед мамнымъяслӧн узьтӧм войясыс колясны рузума кадӧ, а оз кыссьыны помтӧг, верстьӧ пӧраӧдз. Ӧд мамук сьӧлӧмъяс сэтшӧм небыдӧсь, оз позь найӧс дойдавны. Мед дыр на оласны орччӧн дона йӧз, гажӧдасны миянӧс, велӧдасны овны.
     И огӧ вунӧдӧй выльысь и выльысь шуны мамукъяслы: «Аттьӧ, донаяс, мый ті эмӧсь! Ті миян медся бурӧсь!»

четверг, 26 марта 2015 г.

Лямпиада

10-ысь нин Ыджыдвиддзын нуӧдсьӧ "Лямпиада" гаж, а ме эг на и убелит сэтчӧ волыны. Век мыйкӧ падмӧдӧ. Бур, мый фото да видео пыр кӧть верма "видзӧдлыны", кыдз-мый ставыс вӧлі)))


пятница, 13 февраля 2015 г.

Ыджыдвидзсаяс

Ыджыдвидзса челядь пырöдчӧмаӧсь «Ме коми кывсö радейта да тöда» флешмобö. Найӧ лыддьӧны Ыджыдвиддзысь петӧм нималана коми гижысь Александра Петровна Мишариналысь кывбур. А бура и артмӧма! Молодечьяс!
 

пятница, 6 февраля 2015 г.

Медводдза кывбур

     Кор ме гижи меводдза кывбур? Татшӧм юалӧм овлӧ челядьсянь аддзысьлӧмъяс дырйи. Абу эськӧ ыджыд поэт да, но лыддьысьысьяскӧд паныдасьлӧмъяс овлӧны жӧ корсюрӧ)).
     Медводдза кывбуртӧ гижи школаын, 5 классын. Коми кыв велӧдысь Ольга Ивановна Мишарина сетіс гортса удж - ар, жар, тыр, дыр рифмаяс отсӧгӧн гижны ар йылысь кывбур.
     Ставӧн гижим. Унджыкыслӧн артмӧма. Сӧмын "тыр" - ставлӧн гӧбӧч тыр град выв пуктас, а "дыр" - дыр кежлӧ тырмас нуръясьны.
     Менам мӧдпӧлӧсджык лои кывбурыд да, велӧдысь ошкис. Радӧй! Ӧні эськӧ аддза - нэриник кывбур, рифмаӧн ворсӧм сӧмын, но медводдзатӧ гижан да, кор нӧшта ошкасны да - нимкодьыд гач тырыд! 
     Сэсся вочасӧн чӧжсьыны кутісны гижӧдъяс, торъя тетрадь лӧсьӧді весиг... Гожся университетын велӧдчӧм... "ЛИТО-Арт" котырӧ пырӧдчӧм... Медводдза ичӧтик небӧг...
     Гашкӧ, коркӧ и мӧд петас. А медводдза кывбурыд век на вежӧрын:
     Бара воис зарни ар.
     Ывла вылын век на жар.
     Зарни корнас муыс тыр.
     Гажа арыс мунас дыр.

четверг, 5 февраля 2015 г.

Коми газет-журнал

     Ӧтпускӧ петі да, коми газет-журнал дінысь ори (удж вылын лыддьылі водзті). А нинӧм шогавны! Гортӧдз тай локны кутісны "Коми му" и, "Йӧлӧга" и, "Би кинь" и, "Войвыв кодзув" и, "Чушказі" талун вайисны и.)) Ог тӧд ӧнӧдз, енкӧлаыс ыстӧ, али бур морт гижӧдіс, али сорасьӧмӧн вайӧны миянӧ. Алёна Шомысова тай шуӧ, мый Кӧдзыд пӧльыс ыстӧ.)) Адресыс менам... Лыддя да, мичаа тэча, друг, кодкӧ виччысьӧ гортас, а мӧдлаӧ воӧны коми гижӧдъяс. Колӧ эськӧ шыӧдчыны Коми йӧзӧдчан керкаас ли, пошта вылӧ ли. Тӧдмавны, кыдз да мый... Ыджыд аттьӧ водзвыв висьтала - коми гижӧд кывйысь эг ор да.))
 

среда, 4 февраля 2015 г.

Ы

Тӧд вылӧ: "Ы" том йӧзлы литература газетлӧн ӧтуввезйын эм аслас лист бок. Сэтчӧ ми старайтчам пыртны став гижӧдсӧ, мый петӧ "Ы" газетын. Бытьӧн пыралӧй да лыддьӧй!))

вторник, 3 февраля 2015 г.

Пуяс

     Мукӧддырйи киӧй лудӧ мыйкӧ вӧчны ас киӧн - мичмӧдны жыр. Некымын пу "быдті" нин. Ыджыд мам моз донъяла - шӧрпӧлӧса артмис)). Козин вылӧ нин весиг эз вӧв яндзим вӧчны.
 

 

понедельник, 2 февраля 2015 г.

Чужан кыв

     Инесса Трусагина (Орёл), винёв коми ныв, "Сёрни-басни" котырын мӧвпыштіс да дасьтіс флешмоб "Коми кыв ме радейта да тӧда". Шӧр мӧвпыс - коми войтыр лыддьӧны коми кывбуръяс да тадз петкӧдлӧны чужан кывлысь мичлунсӧ, зумыдлунсӧ, авъялунсӧ.
     Неважӧн акцияӧ пырӧдчис и коми кыв туялысь Евгений Александрович Игушев. Лыддис сійӧ Владимир Васильевич Тиминлысь "Чужан кыв" кывбур. А тайӧ кык мортсӧ ме зэв ёна радейта да пыдди пукта. Менӧ видео нимкодьмӧдіс. Чайта, и мукӧд видзӧдысьясӧс тшӧтш. Ӧд быдӧн коми йӧзысь, чайта, вермас мыйыськӧ аттьӧавны профессорӧс да гижысьӧс. Со код вылысь колӧ велӧдчыны ӧнія том йӧзлы!
 
 
Зарни бордъяса,
Медся мыла,
Чужан кыв - менам олӧм да вӧт.
Позьӧ сёрнитны
Любӧй кылӧн,
Сӧмын ӧтдортны ассьым
Ог мӧд.
 
Войвыв эрдъяслӧн
Повтӧм лэбач, -
Сетіс вын сылы
Коми му,
Но, а сӧстӧмлун сетіс,
Дерт жӧ,
Сылы матушка-Эжва ю.
 
Сійӧ тіянлӧн,
Пӧльяс, пӧчьяс,
Сійӧ тіянлӧн,
Ныв да зон.
Мӧвпыд ас кывйӧн
Кык пӧв стӧчмӧ,
Мортыд ас кывйӧн
Кык пӧв ён.
Владимир Тимин


воскресенье, 1 февраля 2015 г.

Нюмсер куд

     Сё во нин абу пыравсьӧма блогӧ. Колӧ бытьӧн бара босьтчыны уджӧ! Майбыр, ӧтпускӧ петі да, позяс лун и вой гижасьны)))
     Мый выльыс? Ен отсӧгӧн, помӧдз воис во гӧгӧрся удж - гижысь челядькӧд уджалӧм да медбур гижӧдъяссӧ "Нюмсер куд" небӧгӧ шымыртӧм. Январнас кывбур-висьта ӧктӧд петіс, сэк жӧ и чукӧртлім лыддьысянінӧ гижысь да серпасалысь ныв-зонмӧс ыджыд гаж вылӧ. Быд авторлы вичмис выль небӧг. Зэв тай шудаӧсь томиник авторъяс сулалісны сцена вылын - долыд и аслыныс, и мам-батьыслы, и велӧдысьяслы.
     Елена Васильевна Козлова да Владимир Васильевич Тимин тшӧтш ошкисны том гижысьясӧс. Нимкодьныс! Бур, кор ставыс сьӧрсьӧн-бӧрсьӧн бура артмӧ. Дерт, ёна ковмис ноксьыны во чӧжыс, но век жӧ, ставыс збыльмис! Сэсся кокни сьӧлӧмӧн и петі шойччыны)))
 

четверг, 8 января 2015 г.

Музей

И.А. Куратов музейын челядьлы нуӧдсьӧ зэв муса выльвося гаж. Позьӧ гижӧдчыны да ветлыны. Любуш артисталӧ! Абу, дерт, кӧза Муза, но тшӧтш зэв Муса)).
 

среда, 7 января 2015 г.

Рӧштвоӧн!

Югыд мӧвпъяс да сӧстӧм лов!!!