понедельник, 26 сентября 2016 г.

Челядьлы: "Кысӧй"

Мишуккӧд мунім уличаті, дінті кысук котӧртіс да юрам воисны медводдза строчкаясыс. А гортын и ставнас кывбурыс ладмис.


- Кысӧй, кысӧй, пашкыр бӧж,
Кутшӧм тэнад овлӧ тӧжд?

- Сёйны нӧк да лакны йӧв,
Нюжӧдчывны уна пӧв.

- Кысӧй, кысӧй, пашкыр бӧж,
Кутшӧм тэнад овлӧ тӧжд?

- Сюся кыйӧдчыны пыр,
Мед оз пышйы меысь шыр.

- Кысӧй, кысӧй, пашкыр бӧж,
Кутшӧм тэнад овлӧ тӧжд?

- Ӧшинь вылын пӧжны мыш,
Личкывлӧ кор менӧ дыш.

- Кысӧй, кысӧй, пашкыр бӧж,
Кутшӧм тэнад овлӧ тӧжд?

- Ичӧт Ваньлы сьывны мойд:
Узь вай, зарни пи, бур вой!

воскресенье, 25 сентября 2016 г.

Чӧскыд рыт

     Коми республикаса гижысь котыр да "Спасский" сёянін дасьтӧны нималана поэт Серафим Алексеевич Поповӧс казьтылан рыт. Быд окотитысь вермас локны кӧч тӧлысь 29-ӧд лунӧ квайт час рытын "Спасский" ресторанӧ, мед чӧскыд пызан сайын* сёрнитны поэтлӧн творчество йылысь. Рыт вылӧ воласны С.А. Поповлӧн рӧдвужыс, тӧдчана литераторъяс да коми кывбур лыддьыны радейтысьяс.
     Аддзысьлытӧдз!
     *Сёян-юан доныс - 250-350 шайт.

суббота, 24 сентября 2016 г.

Миян котыр

     Анялы коми кывйысь сетӧмаӧсь гортса удж - вӧчны проект "Миян котыр". Урок вылын да гортын серпасалӧны-мӧвпалӧны юкӧнъяс. Талун тшӧктӧмаӧсь корсьны небӧгъясысь котыр йылысь кывбур. Ми эг кутӧй корсьысьны, асьным гижим.
Со мый артмис:
***
Миян котырын вит морт,
Быдӧн ӧта-мӧдлы ёрт.
Вӧчам удж да ворсам ӧтув,
Бур да лёксӧ ставлысь тӧдам.

Батьлӧн кывкутана уджыс,
Мамӧй юрлӧс вурны кужӧ,
Ыджыд вокӧй сьылӧ бура,
Ичӧтдджыкыс векджык дурӧ.

Но а меным муса ывла,
Ёртъяскӧд сэн котравлывла.
Тадзи ми зэв бура олам,
Ӧта-мӧдлы ёна колам.

пятница, 23 сентября 2016 г.

Куим челядь?!

     Ӧльӧш Рассыхаев гижӧ, мый колӧ ёнджыка мӧвпавны канмулӧн талунъя олӧм йылысь блогъясаным. Но мый, мӧвпалыштам?
     Ме кӧсъя сёрнитыштны кага чужтӧм йылысь. А стӧчджыка кӧ сы йылысь, отсасьӧ-ӧ канму кага быдтӧмын либӧ прӧста висьталӧ, мый отсасьӧ. Дерт, коми йӧз велалӧмаӧсь ас сьылі вылас ставсӧ кыскыны, некодлысь нинӧм оз корны. Но век жӧ...
     Кагукӧс том бать-мам лӧсьӧдӧны, мед джудждӧдны муслунсӧ. Кагука котыр - тайӧ тырвыйӧ котыр. Дерт, том гозъя чужтӧны ичӧт мортсӧ аслыныс, оз кодлыкӧ. Отсӧг ёна некодсянь оз виччысьны. Да и код отсалас, шуам, патераӧн? Канму важӧн нин оз сет оланінтӧ, сӧмын корсюрӧ, но тайӧ мӧд сёрни. Та вӧсна и медводдза кагукыд чужӧ либӧ недыр кад мысти кӧлысь бӧрся, кор юрыд бергалӧ на шудысла, либӧ ёна нин сёрӧн, кор бать-мам зумыда сувтӧны кок йылӧ, сійӧ жӧ патерасӧ кор ньӧбӧны.
     Веськыда кӧ шуны, ӧти кага кӧ котыраныд, канму сідз и шуӧ: "Быдтысьӧй бура, но энӧ ёна дыр мӧвпалӧй мӧд вылас, ми сӧмын мӧд кага чужтӧм бӧрад отсыштам". Удж вывсяньыд мынтӧны 40 прӧчент удждонсьыд, а он на кӧ уджав, канму мынтӧ 3 сюрс гӧгӧр кагуклы ар да джын тыртӧдз. А сы бӧрын серам петана сьӧм - 60 шайт быд тӧлысь 3 арӧсӧдз. Детсадъяд куим арӧс гӧгӧр и веськалан векджык медводдза да мӧд каганад, та вӧсна верӧсыдлы ӧтнаслы лоӧ вердны воысь дырджык куим либӧ нёль морта ичӧт котырнытӧ.
     Ме ачым Максимӧс студенталан кадӧ вайи, 600 шайт мынтіс велӧдчанін, кыдз казьтыла, а Аннушкӧд пукалӧмысь канму - 2 сюрс гӧгӧр. Дерт, ми сэки дача вылын олім, банкъяслы эгӧ на сэтшӧм уна сьӧм уджйӧзаӧсь вӧлӧй да, кокньыдджык вӧлі быдтысьнысӧ. Град йӧрын ставыс быдмӧ, пуыштан да и вердан челядьтӧ да удж вылысь воӧм верӧстӧ.
     Сэсся ми Аннушкӧд веськалім нин канмусянь ыджыд отсӧгӧ, кор мӧдӧд кагукысь мынтӧны ыджыд сьӧм. Сэк кадӧ тайӧ вӧлі 250 сюрс. Тайӧ сьӧмсӧ ми бӧртиджык пуктім патера вылӧ.
     И таысь ми шуам канмулы аттьӧ! Буртор тайӧ, торйӧн нин оланінтӧм бать-мамлы. Дерт, дзонь патера он ньӧб, но кӧть кутшӧмкӧ пай.
     Мӧдӧд кагуккӧд пукалысь мамлы тырмытӧмторъяс сэтшӧмӧн жӧ кольӧны. Медыджыдыс - во да джынсяньыс 60 шайтӧн ылӧдлӧмыс, ӧд садикад мойвиӧ зэв этша мортлы веськавны куим арӧсӧдз.
     Но кор ставыс пуксьӧ ас местаас, кор мамыс петӧ удж вылӧ, челядь ветлӧны садикӧ, а верӧс отсасьӧ, кыдз вермӧ, нёль морта котырыс зэв шуда. Челядь быдмӧны, лунысь-лун шензьӧдӧны мыйӧнкӧ выльторйӧн, ӧта-мӧдкӧд ворсӧны, оз гажтӧмавны. Керкаад кылӧ гулыд серам. Ме эськӧ быдӧнлы сиа чужтыны кык либӧ унджык кага. Тадзтӧ гажаджык овнытӧ. Тадзтӧ сьӧлӧмыд сьылӧ, кор воан гортад!
     А сэсся, кузя-вӧляӧн, и коймӧд кагук вылад колӧ ырыштчыны. Ме век кӧсйылі куимысь не этшаджык челядьӧс. Тадз и лои. Неважӧн миян чужис Мишук пи. Миян чача. Ставӧн сійӧс радейтӧны, чеченитӧны. А сійӧ тӧдӧ та йылысь, да мукӧдысь наянитӧ.
     Ас серти шуа, мый коймӧд каганад канмуыд ёна отсасьӧ. Та дырйи мынтӧны оз сӧмын удж вывсяньыд, но сувтанныд кӧ сьӧм судзсьытӧм семьяяс лыдӧ (верӧсыдлӧн кӧ удждоныс абу 40 сюрс, то 5 морта котырнад веськаланныд тайӧ отсӧгас), кык ыджыдджык челядьыдлы мынтасны 400 шайт сайӧ, а коймӧдыслы - 11 сюрс быд тӧлысь. Ме ӧні, позьӧ шуны, босьта сійӧ жӧ удждонсӧ, кыдз и удж вылын. Дерт, ар да джыннад сьӧмыд этшмас, но тані канму бара отсалас - куим челядя котырыд лыддьыссьӧ уна котыраӧн, та вӧсна кагуктӧ садикад босьтасны водзджык, мамлы позяс петны удж вылӧ. Со тай, Мишукӧс тшӧтш регыдъя кадӧ виччысьӧны садикӧ.
     Сэсся республика на отсалӧ - сетӧ 150 сюрс шайт коймӧд кагаысь. Ми бара на пуктім тайӧ сьӧмсӧ патера вештӧмӧ. Ӧні нин верӧслӧн удждоныс вештӧ быд тӧлысся уджйӧзсӧ банклы, а водзті ковмыліс и менсьым сьӧмсӧ содтыны.
     Та кындзи, мынтӧны неуна и школаӧ автобусӧн ветлӧмысь гырысьджык челядьлы, Мишуклы йӧв вылӧ сетыштӧны, би мынтыны сьӧм ыстӧны и. Мыйсюрӧ нӧшта на эм. Ми кабалаяс серти век на сиктын олам, а карын олысьяслы весиг му тор вичмӧ, онӧ на кӧ вывті ыджыд патераын олӧй.
     Мытшӧдъясыд, дерт, век эмӧсь. Шуам, висьталӧны, мый вичмӧдӧны лекарство челядьлы, а кымынысь эг юав, некор на эз козьнавны. Век лоӧ ньӧбны. Банкыдлы удждонтӧ кор сетан, он на ёна лышкыдась коляс сьӧм вылад, ӧд и сёйны-юны лоӧ, челядьтӧ пасьтӧдны, машинатӧ вердны и.
    Дерт, быд котырлы отсӧг лоас аслас, ёна видзӧдасны кабалаяснытӧ, корласны унаысь и вайны сійӧ, вайны эсійӧ, кырмасьны сэтчӧ-татчӧ да с.в. Нокыс уна, но отсӧгыд сэсся лоас жӧ.
     Сідзкӧ, шуа, мый коймӧд кагатӧ колӧ лӧсьӧдны! Кыкыс кӧ эм нин, коймӧдыд сэні нин! Бать-мамлӧн коймӧд кагаыд - чача, а ыджыдджыкъяс - отсасьысьяс.
     Ме сиа ставныдлы дзоньвидзалун, шуд да ыджыд муслун! Керка тыр челядь да нук-нучка! Ті ставсӧ верманныд, дерт, отсӧгысь эн жӧ эновтчӧй!

четверг, 22 сентября 2016 г.

"МИШУК" котыр

     "МИШУК" котырын эм уна мичтор, мед югзьӧдны жыръяснытӧ: сера юрлӧсъяс, дзоридза пуяс, небыд чачаяс. Кодсюрӧ шыӧдчылӧ и рочысь коми вылӧ мыйкӧ вуджӧдны. Радпырысь вуджӧдам юрлӧсъяс вуригкості!
     Корсюрӧ, дерт, дышӧдлывлӧ вурсьыны-лепитчыны да, эновтчыла. Мыйкӧ аслым гортӧ вӧча либӧ рӧдвужлы козинъяс. А сэсся выль вынъясӧн и котырӧ кутчыся.
     Гижысь ёртъяс эськӧ ӧлӧдӧны гижан кадсӧ мӧдтор вылӧ бергӧдӧмысь. Но киӧй лудӧ да))) юр-вемӧй мыйкӧ озджык. Гежӧдіника тай кывбурася... Колӧ, эськӧ, киӧ ачымӧс босьтны, мед быдлаӧ удитны.
     Со тадз и олам... 24 часыд некор оз тырмы став кӧсйӧмтор вылас...

пятница, 16 сентября 2016 г.

11

     Талун Нестеров гозъя пасйӧны 11 во кӧлыссянь. Кӧсйим чӧв-лӧня гортын пукыштны, тшай юны.
     Пукавсис))
     Луннас, челядь школаын на вӧліны, верӧс удж вылын, а ми Мишуккӧд больничаын, вокӧй звӧнитӧ, деревняысь гӧтырыскӧд локтӧмаӧсь гуляйтны да, машинаыс жугалӧма, отсыштны корис верӧсӧс.
     Ӧдйӧ больничаын помалім уджъяс да локтім гортӧ гӧсьтъясӧс вочаавны. Найӧ вина дозйӧн да кампет кӧрӧбӧн локтісны да, пукыштім ӧтвыв, "тшаюйтім". Сэк кості верӧс воис, гезйӧн пысалӧмӧн сэсся и нуӧдіс сиктӧдз налысь машинасӧ.
     Челядь школаысь воисны, шыд панялыштісны, ме школаӧ собранньӧ вылӧ котӧрті, Мишукӧс видзны сэк кості локтісны муса чоюкъяс. Пуӧй, мися, мыйкӧ чӧскыдӧс, ужнайтам бӧрас, прӧдуктасӧ коли.
      Школаысь вои, пуксим ужнайтны, код гортын вӧлі, костас бӧра-водз воліс верӧслӧн чойыс нылыскӧд. Пӧтім да, чойяс мунісны гортаныс, челядь ворсны пуксисны, ме блогйыся, а верӧс век на туйын...
     Со тадз, уна гӧсьтӧн да уна лоӧмторъя коли "чӧв-лӧнь" луныс.
     Миянлы, Нестеров семьялы, козин пыдди вӧчи со татшӧм мичтор. Шуд да бур миянлы!
     А дорас сулалӧны верӧсӧн козьналӧм мича дзоридзьяс))
     Но найӧс аддзанныд, тшӧтш тӧвнырыс кӧ тіянӧс миянӧдз ваяс))

четверг, 15 сентября 2016 г.

Чӧсмасям! Сола ӧгуреч*

Аня бара на корис восьтны сола ӧгуреч банка. Татшӧм ӧдӧн тулысӧдз оз тырмы))
Со кыдз ӧгуречтӧ солалӧ Тувсовъяыд*. Гортсаяслы ёна кажитчӧ.
Миянлы ковмас: ӧгуреч, лук, чеснок, морков, быд сикас турун-кор: сьӧд сэтӧр, вишня кор, хрен, Лаврушка, укроп, та кындзи сакар, сов, сьӧд да душистӧй переч тусьяс, уксус.
Но мый, заводитам!
1. Медводз кӧтӧдам ӧгуречсӧ ваын час 3-5. Мича мыськам да пуктам ки чышкӧд вылӧ косьтыны. Мыськам-весалам морков, лук, чеснок. Мыськам да косьтам нетшкӧм турун-кор.
2. Лӧсьӧдам банкаяс, кодлы кыдз кажитчӧ, ичӧтын соласьны либӧ ыджыдъясын. Ме векджык солала ичӧт ӧгуречьяс литра банкаясын, но таво, саридзьясын ветлігкості ковмис и 3 литра дозъясӧ солавны, ыджыда быдмӧмаӧсь да.
3. Банка пыдӧсӧ пуктам турун-кор. Шуам, 1 литра банкаӧ 2-3 сьӧд сэтӧр да вишня кор, 1-ӧн хрен кор, укроп зонтик, Лаврушка, нӧшта содтам 2-3-ӧн кыкнан пӧлӧс перечсӧ. Сэсся тэчам морков, лук да чеснок. Шӧрпӧлӧс морковсӧ торйӧдлӧмӧн, луксӧ да чеснок торсӧ ӧтикан.
4. Мичаа, топыда, ыджыда коставлытӧг тэчам ӧгуреч. Ме помъяссӧ весиг ог вундав, кодкӧ ӧгуречсӧ весиг торйӧдлӧ.
5. Пуам ва да кисьталам банкаясӧ. Ме дарйӧн кисьта. Колӧ, мед вевтыд вӧлі нин дась. Ватӧ кисьтан да, пырысь-пыр вевттян банкасӧ. Он на гарт. Мед тадз сулыштас ӧгуречыд, а кор ваыс кӧдзыштас, шуам, 30 градусӧдз, бӧр васӧ кисьтан пуан дозйӧ да пуктан шонтыны тайӧ рӧсовсӧ. Ме васӧ кисьта рузя вевт пыр.
6. Пӧсь ванас ӧгуречтӧ колӧ кисьтны куимысь. Коймӧдысьсӧ кисьтытӧдз мед тэнад вӧлі нин пуктӧма сов да сакар. Пань лыдсӧ быд кӧзяйка ас ногыс пуктӧ. Ме вӧча тадз: 2 ичӧт пань сов, абу мед чукъя, 3 ичӧт пань сакар чукъяӧн. Пӧсь ватӧ кисьтігӧн содтан нӧшта 30 гр. ӧкмыс прӧчента уксус.
7. Ӧні нин позьӧ гартны вевтъяссӧ, пуктыны гатшӧн да бура тӧбны.
Тӧвнас пызан выланыд лоас чӧскыдсьыс-чӧскыд сола ӧгуреч.
Нянь да сов!

среда, 14 сентября 2016 г.

Тувсов руа

Век на тай тулысын ола...

***
Кывбурын вильшасьӧ тулыс.
Шогсьыны вӧля оз сет.
Ловзьӧдӧ сійӧс, мый куліс,
Мыччӧ, мый водзті эз пет.

Кывбуркӧд сӧвма и ачым,
Корся сэсь лолавны вын.
Сувта бӧр кок йылӧ надзӧн -
Пузувта нэм сайся лым.
                            Алёна Старцева

вторник, 13 сентября 2016 г.

Чӧсмасям! Кабачокысь икра*

     Таво гожӧм озыр град выв пуктас вылӧ. Тӧвнас огӧ кутӧй виньгыртны. Ӧгуреч солассис, ӧні польӧпиян кодь кабачокъяс виччысьӧны ассьыныс черед.
     Талун ме висьтышта, кыдз пуа кабачокысь икра. Тайӧ рецептсӧ мен висьтавліс коркӧ сусед аньӧй, мыйсюрӧ вежышталі, кыдз мен лӧсялӧджык. Тӧвся чӧсмасянтор вылӧ колӧ со мый: град вылысь кабачокъяс, морков, чеснок да лук, лавкаысь - майонез, помидорысь паста, сьӧд изӧм переч, Лаврушка кор, сакар, сов, кӧнтусь вый.
     Серамыд лои лавка ветлігӧн. Зарплатаӧдз кӧшельын коли 200 шайт да 200 шайт карточка вылын. А икратӧ пуны быть ӧні, унаысь на мед удитны да кабачокыд мед оз удит сісьмыны. Муні лавкаӧ, чукӧрті кӧрзинаӧ нянь-йӧв, челядьлы чӧсмасянтор, а сэсся куті кыйӧдны донтӧмджык помидора "рунь" да майонез. Сэсся касса вылас мынтыси кык пӧръяӧн, медводз карточкаӧн, а сэсся сёясӧн. Тырмис тай буретш!
     Ставыс лои вайӧма-ньӧбӧма. Позьӧ кутчысьны пусьӧмӧ.
*Тувсовъялӧн кабачока икра (кабачокныд кӧ абу, волӧй, юкся):
1. Весалам кабачокъяссӧ кышысь, вундалам ичӧт торъяс вылӧ, мед изанӧ тӧрас, мыськам да весалам морков, а сідзжӧ лук да чеснок. Сы бӧрын кабачоксӧ, морковсӧ да луксӧ изам торъя дозъясӧ мясорубкаын, чесноксӧ посньӧдлам.
2. Кабачоксӧ пуктам пуны неыджыд би вылӧ, содтам сы дорӧ чеснок, помидорысь "рунь" да майонез, пуигас тшӧкыда гудралам, мед пыдӧсыс оз сотчы. Менам ыджыд пусян доз, уна сэтчӧ тӧрӧ ставыс, а тіян вермас лоны кӧть кутшӧм. Шуам, босьтанныд кӧ 3 кило кабачок, ковмас 4-5 чеснок тор, 250 гр. майонез да 300 гр. томатысь паста.
3. Торъя рачьясын пражитам морков да лук (шуам, кило джынйӧн), содтам найӧс кабачок пуан дозйӧ, водзӧ гудралам. Тайӧ "роксӧ" пуам час.
4. Кабачокысь рок дорӧ час мысти содтам сакар (стӧкан джын), сов (2 ыджыд пань), кӧнтусь вый (100 гр.), сьӧд изӧм переч (ичӧт пань джын) да Лаврушка кор. Гудралам да пуам нӧшта 1 час.
5. Икра пуигкості мыськам-лӧсьӧдам банкаяс, вевтъяс да с.в.
6. Кык час мысти, видланныд пуантортӧ да, чӧскыд кӧ, кусӧданныд да индаланныд банкаясӧ, бура вевттянныд кӧрт вевтъясӧн. Ме банкаяссӧ медводз кута пӧсь ру улын, а вевтъяссӧ кисьта пӧсь ваӧн.
7. Тӧвся чӧсмасянтор дась! Нянь да сов!

понедельник, 12 сентября 2016 г.

Яндзим

     Неважӧн козьналі ассьым небӧгӧс ёртлы. Талун паныдалі сійӧс ывлаысь. Серам петтӧдз лои. Висьталӧ: "Сьӧлӧмсянь пукси лыддьыны кывбуръястӧ, вои том йӧзлы сиӧм гижӧдӧдз да сэтшӧм яндзим лои ас водзын да челядь водзын, коминас ог сёрнит накӧд да, дзик быттьӧ меным и гижӧмыд кывбурсӧ. Тупки небӧгтӧ да коли мӧд кадӧдз. Век на кывъяс вылад мӧвпала..."
     Ме рад, мый гижӧдӧй мӧрччис кодлыкӧ. Гашкӧ, и мукӧд том бать-мам думыштчасны, оз мырддьыны кагукыслысь чужан кывсӧ...
      А со и сійӧ кывбурыс:
***
Коми йӧз, мый нӧ ті керанныд?
Пӧльяслысь оласног неранныд!
Юр вывсянь кок улӧдз рочманныд,
Лунысь-лун быранныд-шочманныд.

Мыйла нӧ асланыд пиянад
Кыв дінӧ муслунсӧ вианныд?
Он накӧд сёрнитӧй комиӧн,
Кытчӧдз ми тадзитӧ воамӧй?

Збыль ӧмӧй, Коми му выланым
Рочьясӧн асьнытӧ кыланныд?
Абу нин кольӧма яндзимныд.
Кокньыд тай петан туй аддзӧмныд!

Воӧй бӧр ас садяд, донаяс.
Ставӧн ми Парма йӧз, комияс.
Ачымӧс кора и тіянӧс –
Быдтам вай коми ныв-пиянӧс!
                               Алёна Старцева

воскресенье, 11 сентября 2016 г.

Танюш

     Татьяна Кирпиченко - изьваса ань, том гижысь, роч кыв велӧдысь, мича да шань ныв. Танюшкӧд ми тӧдмасим литература семинаръяс дырйи. Миян, том гижысьяс пиын, сійӧ вӧлі медся рам. Эз уна сёрнит, но гижӧдъясыс вӧрзьӧдісны сьӧлӧмтӧ асланыс джуджданас.
     Кор ме тӧдмалі, мый Таня 5 арӧсӧдз сёрнитӧма сӧмын рочӧн, эг эскы. Сэтшӧм мича коми кывйӧн гижӧ да. Вӧлӧм, коми садикӧ веськалӧм бӧрын ныв пуктӧма ас водзас мог - бытьӧн велӧдны кывсӧ, а сэтчӧдз чӧв овны. Во мысти Таня зэв бура сёрнитӧма изьва диалект вылын. Миянлы, комияслы, колӧ босьтны Таняӧс пример пыдди, челядькӧд рочасям да, пӧль-пӧч кывнымӧс кывнымӧс увтыртам да.
     Неважӧн миян, куим том авторлӧн, петісны ичӧтик небӧгъяс. Таня эз вермы волыны небӧг нимӧдӧм вылӧ. Асьным лыддьыштім йӧз водзас сылысь кывбуръяссӧ. Меным "И воас лун..." небӧгысь медъёна кажитчӧ со татшӧм куим строчкаа кывбур:
     "Гӧгрӧс гоб-тупылёк радпырысь
     Шонӧдчис дзирыд югӧръяс улын.
     Вешйи."
     Вомгорулын унаысь лыддя тайӧ кывъяссӧ, синъяс водзӧ пыр и сувтас гожся серпасыс. Кутшӧм радейтӧмӧн шыӧдчӧма Таня тшак дорас: "гоб-тупылёк", сэтшӧм мусаник да сэтшӧм ичӧтик, быттьӧ ловъя лов. Кужӧма тай шуны, матыстны вӧр-васӧ лыддьысьысь дорӧ.
     А неважӧн кывсис, мый Таня чорыд висьмис. Ми эг эскӧй, мый тайӧ мича, шань, енбиа нылыскӧд вермас лоны мыйкӧ лёк. Быттьӧ некыдз эз вермы ӧтлаасьны Танялӧн образ пеж висьӧмыскӧд. А висьӧмыд тай оз юав! Локтӧ и уськӧдӧ кок йывсьыд.
     Но Таня оз сетчы висьӧмыслы. Сійӧ, кыдзи и уна во сайын, пуктіс ас водзас мог - вермыны висьӧмсӧ, и ми, ёртъяс да рӧдвуж, эскам, мый тадз и лоас.
     Танялӧн вынъяс дорӧ содӧ уна-уна йӧзлӧн вын, кодъяс сиӧны став бурсӧ нывлӧн котырын "Татьяна Ануфриева (Кирпиченко). Острый лейкоз!"
     Танюшлӧн гижтӧм на уна кывбур-висьт, Танюшлӧн быдмӧ ичӧт пи, Танюш вермас висьӧмсӧ! Эскам!