Сы дінӧ

***

Мыйла нӧ шогыс мортыслы сетӧма?

Коді нӧ сыла йӧз муӧ ветлӧма?

Ӧні со олӧ яндзимсӧ тӧдтӧг.

Лунысь-лун выльӧс синваас пӧдтӧ.

 

Мыйла нӧ шудсӧ лоӧ век суӧдны?

Оз, ӧмӧй, вермы ки пӧлӧд нуӧдны

Олӧмас, кӧні югыд да гажа,

Сы дінӧ, коді виччысьӧ важӧн...

                                                                      Алёна Старцева

10 тӧлысь

Талун меным 10 тӧлысь. Сьӧктаӧй - 8700 грамм, тушаӧй - 71 см.

Радейта видзӧдны ӧшиньӧ да мунысь машинаяслы петкӧдлыны данньӧ. Дзижнад ворса тшӧкыда, весиг "бв" шуа, кор машинаыд мунӧ.

Пуктыла киӧс пель дорӧ да быттьӧ телефонӧн сёрнита, весиг "а" шуа.

Батьӧй кор удж вылысь локтӧ, матыстча да лэпта киясӧс, мед катӧдас моздорас, а сэсся петкӧдла чуньӧн, кытчӧ колӧ мунны. Медъёна радейта кухня вылысь магнитъяс йирны.

9 тӧлысь

Меным ӧкмыс тӧлысь. Сьӧктаӧй - 8400 грамм, тушаӧй - 70 см.

Радпырысь сёя кампет да Чупа-чупс. Ки пӧлӧд ветлӧдла джоджӧд, окота кӧ, сувта диван дорӧ.

Меысь он дзеб восьса шкапъяс, коркӧ весиг помӧй ведра гугӧді.

Дзебсясьӧм

***

Мишук дзебсясьӧмысь ворсӧ,

Пикӧ воис коньӧр мам –

Керка пасьта писӧ корсьӧ,

А со Мишук, вӧлӧм, тан.

 

Алёна Старцева

Чӧскыд вом

***

Коз пу улын чӧскыд кулёк,

Кулёк дорын ичӧт зон.

Ланьтӧдчӧмӧн кампет кульӧ –

Аттӧ кутшӧм чӧскыд вом!

 

Алёна Старцева

Выль воӧн! Выль шудӧн!

     Со и пуксис Выль во. Чолӧм, донаӧй! Виччысям тэсянь выль вермӧмъяс, канмулысь зумыда кок вылӧ сувтӧмсӧ, тан олысь йӧзлысь ловнас кыпалӧмсӧ... Шуд виччысям.

Фотоыс "Шуда котыр" группаысь

     Кольӧм воыс меным вӧлі шудаӧн, сійӧ козьналіс Мишукӧс, выль небӧг, да весиг коми газет-журнал во быд воисны пошта кудйӧ (аттьӧ Кӧдзыд пӧльлы).

     Ӧтитор майшӧдлӧ - локтіс кассяна во. Колян кассяна воыс Ыджыдвиддзын медводдза джынсӧ нуис пӧрысь бабъясӧс, гожӧмсяньыс - вундіс версьӧ мужичӧйяслысь лов. Унаӧн кулісны. Батьӧй эз ло... Тӧрыт чойлы операция вӧчисны, сылӧн ичӧтсяньыс кынӧмыс висьышталӧ, кагаӧн вӧлі нин 1 операция, со ӧні мӧд. Бурджык нин талун.

     Кассяна во петкӧдліс гыжъяс. Мый на лоас... Енлысь корам, мед отсалас. Видзӧй асьнытӧ, тшӧкыдджыка висьталӧй дона йӧзлы, кыдз ті найӧс радейтанныд. Кутчысьӧй ӧта-мӧдад. Лоӧй шудаӧсь!

                    ***

Нывбабаяс бӧрдӧны.

Збыль, инӧ, дӧва во матыстчӧ.

                    ***

Сӧмын батьӧ тӧрытысь эз пет.

Сӧмын батьӧ ыджыд шогас кольччис.

А ме сылы сьӧлӧмӧс эг сет –

Сулалі, а коліс мунны воча.

     Сылы лои веськодь вой да лун.

     Сійӧс помасьлытӧм гажтӧм личкис.

     А ме сисьяс ӧзтыны эг мун,

     Вунӧді, мый петан туйыс – вичко.

Коліс эськӧ вӧчны унатор.

Эскӧдана кывъяс корсьны коліс…

А ме батьӧс гӧгӧрвои сёр.

Чукӧсті, но эз нин шыась лолыс.

                                                      Алёна Старцева

Ичӧт кодзувъяс))

     Неважӧн миян йылысь, Нестеров ичӧт котыр йылысь, петкӧдлісны "Миян йӧз" петасын. Аттьӧ Люба Королёвалы, авъя, шань да мича нывлы! Аттьӧ Максимлы, Аннушлы да Мишуклы - ичӧт кодзувъяслы))